Dat Anekdötche mit däm Ässel !

Hier ist das Lesen der hiesigen Heimatsprache gefordert:

Mümanes verzällt Anekdötsche vom Musikzooch. Ene stuure Ässel.

Dat wor met mir jo esu: Hat ech jo ejentlich met dem Musikzooch jenooch am Hals. Trotzdem moot ech us jesundheitliche Jründe och dem Sport menge Tribut zolle. Su wor et net von onjefähr, dat ech en der 80er Joohre als Betreuer von de IV. Mannschaff off ungerwächs woor. Ech wor net der enzijste, demm seng Hobby nävven de Musik, de Sport woor. Löck wie de Hilla Horn, de Rolf Ringen, de Reiner Münz, de Mäc (Norbert Limbach) un de Wolfjang Riemer, alles heutije Alttambouristen, däten unger andere en de IV. Mannschaff - damals noch -TUS  Siebenjebirje - Handball spelle.

Während de Hallenmeisterschaft ein Fröjoohr '81 koom et dann zu foljendem Annekdötscher, wat me ejentlich erlävve moß, denn vom Verzälle alleen jlööv et söns keener. Zu demm Zeitpunk hatten mir en joode Mannschaff - schon en dolle Truppe - alleen at wäjen däm „Toorkipper" un däm „Linksaußen". Der Haupmacker en der Mannschaft woor de Trainerassistent Häns (Bungarz).

Do mir jo meistens jewenne däten, wenn dat nett woor, han mir esu lang jesoffe bees me doch noch jewonne hatte, troofe me uus no däm Spell ein Vereinslokal. Su och damals als de Mäc (Limbach) säät, ech doon ein Herres hieroode. Wodrop spontan de Häns säät:" Wenn dat woor es, regge ech mem Ässel en de Kirch!"

En der Tat, de Mäc dät hieroode un mir stonten em Woort. Jesaat - jedoon, äwe wo kreete me jetz ene Ässel her ? Zorn Jlöck dät ene von uuse Spieler, de „Aulichs Werner" dat Mädche vom Fuhrbetrieb Koll en Königswinter freie - die hatten Ässele jenooch.

De Häns on ech hann kurterhand uuse Scharm spelle looße, un dat Dinge woor jeretz, me konnte de Ässel hann. Domet feng für uns zwei die Arbeet iersch richtich aan. Der Ässel moot jo noh Hennef-Warth, denn do dät de Mäc en de katholische Kirch denn Bund für et Lävve schleeße. Su e Dier jeht jo net einfach en Kirchetrepp erop, dat heeß de „Schmitze Flöck" menge Arbetskolleech, moot met em Firmenware von de Firma Meurer, Dell on sonstije Saache pünklich zum Termin noh Hennef brenge.

Die Saache woore do, un der Steeg met Dell wut de Trepp eh ropp in de Kirch jelääch. Die Saach konnt steje. De Häns wut als Mexicaner parat jemaat, op de Ässel jehoffe un en Richtung Kirchedüür en Marsch jesatz. Doch die Rechnung hatten me ohne denn Ässel jemaat. Mir hann et net jeschaff den Ässel en de Kirch ze bringe ! Die Dell koome wedder fott, on et Seelche wut jehaale.
Dat Dierche hat für der Trepp halt jemaat met dem Häns offen drop, on su wud demm Brautpaar jratuliert. De Zuschauer hann Beifall op offener Szene jejoffen.

Kuurt entschlosse hann mir uns dann op der Wäch nohm Hesprott jemaat, wollte mir doch all jät drinke. De Häns säät: „Wenn mir dat Dier net en de Kirch krieje, dann jeht et bestimmp met uns en de Wiertschaff, denn dat hät doch bestemp ooch Dursch !" Noh dem Motto: „Die Karawane zieht weiter" ham me om Parkplatz beim „Pittermann" denn Ässel wedder usjelaade.

Joot hann mer dem Dier zoojered un ooch noch Zedrinke en de Düür jestallt, in der Meinung, dat hä jetz met uns in die Wietschaff jeht. De Rechnung jing atweder net op. Hät dat Dier en Hennef de Lück noch Zutritt en de Kirch jelosse, hät et sech he quer für die Wiertschaffsdüür jestallt un nix jing mie. De Zotritt zom Vereinslokal wor blockiert - wat jetz ?
No dem Sprichwoort: „Wenn der Driewer sech jät denk, denk der Ässel sech ooch jät". Eh su jing die Saach ze eng.
Sorchfältich han me dat Dierche verlade, Proviant metjejoffe für der Heemwäch. Jetz fing für uns der jemütliche Deel aan, denn mir hatten uns Verspreche jehaale.
Uus Verpflichtunge jedoch jingen wegge, denn die Aktive vom Tambourcorps han oovends demm jungvermälte Paar e Ständsche jespellt. Domit wor wedde ene Daach met enem wirkliche Annekdötscher ze eng.
Dat wor et ens wedde, bes zom nächste Mol !
Üüre Mümanes